# دەسەڵاتی پادشا
## سێزدەیەم بەش — ئارسێڵیا
ڕایتا بە بێدەنگی و وەک سێبەرێکی بێدەنگ لە دوای کایل و تیمەکەی دەڕۆیشت.
دارستانەکە چڕ بوو، بەڵام هەستی بۆنکردنی ڕایتا ڕێگەکەی بۆ ڕوون دەکردەوە. کاتێک گەیشتنە لێواری دارستانەکە، زەوییەکە کرایەوە و دەشتاییەکی پان و بەرین دەرکەوت. لەوێدا، لە ناو جەرگەی دەشتاییەکەدا، شارێکی زەبەلاح بە شوورەیەکی سپی و بەرزەوە وەستابوو.
کایل ئاوڕێکی دایەوە و بە ماندوێتییەکی زۆرەوە بە هاوڕێکانی وت: *”تەنها کەمێکی ترمان ماوە بگەینە ئارسێڵیا، لەوێ پشوو دەدەین.”*
ڕایتا بۆ یەکەمجار ناوی شارەکەی بیست.
*”ئارسێڵیا… کەواتە ئەو شوێنە ناوەکەی ئەوەیە.”*
لە دوورەوە سەیری شارەکەی کرد؛ شارێکی زۆر جوان بوو، منارە جادووییەکانی تیشکیان دەدایەوە، بەڵام دەیزانی وەک گورگێک ناتوانێت لەو دەروازە ئاسنینانە نزیک ببێتەوە.
پشتی لەو ڕووناکییە کرد و گەڕایەوە ناو قووڵایی چیاکان.
دەبێت بگەیشتایە ئاستی ٢٥.
شەوێکی پڕ لە خوێن دەستی پێکرد. ڕووبەڕووی ورچی کێوی ئاستی ٢٣ بوومەوە کە پێستەکەی وەک دار ڕەق بوو، دوای شەڕێکی قورس گەرووم دڕاند. پاشان هەڵۆی کارەبایی ئاستی ٢٤ هێرشی بۆ هێنام؛ بە کارامەیی نەڕەی هەورەبرووسکە باڵەکانیم ئیفلیج کرد و لە هەوادا پەلکێشی سەر زەویم کرد.
خوێنی دڕندەکان هەموو فەرووەکەمی سوور کردبوو، بەڵام کاتێک کۆتا نێچیرم کوشت، دەنگە میتالییەکە لە مێشکمدا لەرایەوە:
> **[ ئاگاداری: ئاستی تۆ گەیشتە ئاستی ٢٥ ]**
> **[ پیرۆزبایی: فۆرمی مرۆیی ئێستا بەردەستە ]**
> **[ سیستەم: تەنها بۆ ٢٤ کاتژمێر دەتوانیت ئەم فۆرمە بەکاربهێنیت، دوای ئەوە پێویستت بە ٢٤ کاتژمێری ترە بۆ دووبارە بەکارهێنانەوە ]**
بەیانی داهات.
ڕایتا لە ناو ئەشکەوتەکەدا دەستی کرد بە گۆڕان. ئێسقانەکانی دەشکان و دەنگێکی ترسناکیان لێ دەهات، مووە زیوییەکانی دەوەرین و پێستێکی سپی و پاک لە شوێنیان پەیدا دەبوو.
کاتێک گۆڕانەکە تەواو بوو، ڕایتا هەستا سەر دوو پێ.
چوو بۆ لای گۆمە ئاوەکە بۆ ئەوەی سەیری خۆی بکات.
ئەوەی بینی، گەنجێکی بێ وێنە بوو؛ قژێکی سپیی درێژ کە تا سەر شانی دەهات، چاوێکی سووری تۆخ کە وەک یاقووت دەدرەوشایەوە، و پێستێکی زۆر سپی کە وەک بەفر وابوو. بەڵام جلەکانی تەنها پارچە حەبایەکی کۆن و قاتێکی دڕاوی ئاسایی بوون، وەک ئەوەی لە جەنگێکی گەورە ڕزگاری بووبێت.
ڕایتا بەرەو شار بەڕێکەوت.
کاتێک گەیشتە دەروازەی ئارسێڵیا، بینی ڕیزێکی یەکجار گەورە لە خەڵک، گالیسکە، و بازرگانەکان وەستاون. پاسەوانەکان بە وردی پشکنینیان بۆ هەمووان دەکرد.
کاتێک نۆرەی ڕایتا هات، دوو پاسەوانی زرێپۆش بە بێڕێزییەوە چەکیان لێ ڕاگرت.
*”بوەستە! بەڵگەنامەی ناسنامەت پیشان بدە!”*
ڕایتا کە تازە فێری قسەکردن بوو، بە دەنگێکی نزم و کەمێک نامۆ وتی: *”نیمە… بەڵگەنامەم نییە.”*
پاسەوانەکان پێکەنینێکی سوکایەتییان کرد: *”بە بێ بەڵگەنامە؟ لێرە بڕۆ پێش ئەوەی فڕێت بدەینە ناو زیندان! ئێرە شوێنی ئاوارەی وەک تۆ نییە!”*
خەڵکەکە دەستیان کرد بە پچەپچ و گاڵتەکردن.
*”ئەوە چی دەگوزەرێت لێرە؟”*
دەنگێکی هێمن و پڕ لە دەسەڵات هات.
پیاوێک دەرکەوت کە نیشانەی فەرماندەیی لەسەر شانی بوو، ڕوخسارێکی باش و پێکەنیناویی هەبوو. پاسەوانەکان کاتێک بینییان، کڕنۆشیان برد.
*”فەرماندە! ئەم گەنجە دەیەوێت بە بێ ناسنامە بچێتە ژوورەوە.”*
فەرماندەکە نزیک بووەوە، سەیری قژە سپییە سەرنجڕاکێشەکەی ڕایتای کرد و زەردەخەنەیەکی کرد. *”تۆ خەڵکی ئێرە نیت، وایە؟”*
ڕایتا سەیری ناو چاوی کرد و وتی: *”نا.”*
فەرماندەکە دەستی خستە سەر شانی ڕایتا: *”تۆ بۆنی جەنگاوەرێکی بەهێزی لێ دێت. مەترسە، من یارمەتیت دەدەم.”*
فەرماندەکە ڕایتای برد بۆ ژوورێکی تایبەت لە ناو شورای شارەکە و لەوێ بەڵگەنامەیەکی کاتی بۆ دروست کرد. پاشان پێکەوە هاتنە دەرەوە بۆ ناو شەقامەکان.
فەرماندەکە ئاماژەی بە بینایەکی زەبەلاح کرد کە نیشانەی شمشێر و قەڵغانی لەسەر بوو: *”ئەوە سەندیکای ڕاوچییەکانە. لەوێ دەتوانیت کار بکەیت، نمرەی خۆت بەرز بکەیتەوە و پارە بەدەست بهێنیت. شارەکە بۆ کەسانی وەک تۆ پڕە لە دەرفەت.”*
فەرماندەکە دوای ئامۆژگارییەکە، بە ڕووخۆشییەوە ماڵاوایی لێ کرد و ڕۆیشت.
ڕایتا ئێستا لە ناو جەرگەی ئارسێڵیا بوو.
شارەکە لە وەسف نەدەهات؛ شەقامەکان بە بەردی مەڕمەڕی ڕەنگاوڕەنگ داپۆشرابوون، فانۆسە جادووییەکان وەک ئەستێرە دەدرەوشانەوە. بازاڕەکان پڕ بوون لە جۆرەها خواردنی نامۆ کە بۆنیان هەموو لایەکی گرتبوو.
ڕایتا بەو قژە سپی و چاوە سوورانەیەوە، وەک ئەستێرەیەک لە ناو خەڵکەکەدا دەردەکەوت.
سەیری دەستەکانی کرد؛ پێستی مرۆیی. زەردەخەنەیەکی تەڵخی کرد.
تەنها ٢٤ کاتژمێری هەبوو پێش ئەوەی ببێتەوە بەو گورگەی کە هەمووان لێی دەترسن.
*”با دەست پێ بکەین.”*
لە دڵی خۆیدا وتی و بەرەو سەندیکاکە هەنگاوی نا.